爲啥體要用粵拼，弗用別個粵語拼音方案？
拼音方案設計原則
拼音方案也叫羅馬化方案。因爲漢字弗是表音文字，個咾用漢字寫个語言全需要一隻拼音方案來表示發音。個咾對拼音方案講起來，頂重要个用場就是表示清爽、表示準足迭門語言个音位系統。在拉廿一世紀互聯網時代，拼音方案貤多仔另外一隻重要用場，就是相幫電腦信息處理，尤其是做拼音輸入法。根據迭個兩點，我伲好總結得出一套評價拼音方案優劣个原則。連下來我伲會得挨一挨二解釋迭個幾條原則，分別舉例說明，用粵拼、弗用別個方案个因由。
原則一：「一隻符號對應一隻音位」
拼音方案表示音位系統要清爽、準足，就要遵循「一隻符號對應一隻音位」原則。啥個意思，就是假使出現仔「一隻符號好代表多隻音位」咾「一隻音位好用幾隻符號轉寫」，個麼迭隻拼音方案就是亂脫哉，迭門語言个音位系統表達來弗準足、弗清爽。
一隻頂熟悉个反例就是普通話拼音（《漢語拼音方案》）。譬方講，字母 e 是一隻音位轉寫，連在 g k h 後、譬方「哥」「科」「呵」个說話發音是 /ɤ/，在韻母 ie 裏向个說話、譬方「些」字，發音變成功 /e/ 哉。但是普拼方案个聲母 j q x 倒是音值寫法，因爲迭個幾隻搭 g k h 是一隻音位。個咾講普通話拼音方案一歇麼用音值轉寫一歇麼用音位轉寫、弗是一致轉寫音位，迭個就違背仔我伲个原則。
迭條原則還有另外一層意思，就是一隻符號具體表示啥個發音，搭迭隻符號个環境弗搭界（環境是指前後兩面个符號）。譬方講耶魯拼音，字母 a 貤好表示長 a，貤好表示短 a。下頭隻表格是耶魯拼音「花」「翻」「分」三隻字个拼法。好看得出，在拉開音節（無麼鼻音咾入聲韻尾）个辰光 a 代表 /a/，閉音節（有得鼻音咾入聲韻尾）个辰光代表 /ɐ/，迭個就是「一隻符號 a 代表 /a/ 搭 /ɐ/兩隻音位」哉。乃麼一樣个，「花」搭「翻」个元音全是 /a/，但是一隻拼成功 fa 一隻拼成功 faan，就是「一隻 /a/ 音位用 a 搭 aa 兩隻符號表示」。
| 花 /a/ | 翻 /a/ | 分 /ɐ/ |
|---|---|---|
| fa | faan | fan |
個咾耶魯迭能就是「一隻符號實際代表啥個音要搭環境搭界」，符號 a 到究代表 /a/ 咾 /ɐ/ 要看是開音節咾閉音節來判斷（後頭連隻 n 麼就是 /ɐ/，啥物也無麼就是 /a/）。迭個就是耶魯个設計缺陷之一。粵拼統一規定 aa 就是 /a/，a 就是 /ɐ/ ，用弗着看前後環境直接就好曉得是啥個音。
原則二：避免使用附加符號搭非 ASCII 字符
我伲要儘量讓一套拼音方案只用 ASCII 字符集（美國資訊交換標準代碼）裏向个字符，就是要儘量只用廿六隻英文字母加數字就好表達成功整隻方案，弗用 ´ˋˇ˘˜ 迭牌符號。迭個是出於信息時代方便信息處理个考慮，因爲迭能好避免脫交關潛在問題搭 bug。
一隻頂熟悉个例子，就是普通話拼音裏向个 ü。大家全有數个，打迭隻 ü 幾許搞頭勢，估計大家平常打迭隻符號全是網上向複製複製。用 ü 迭隻符號除脫輸入弗便當，還有隻問題就是在 ASCII 字符集裏向無麼个，個咾弗好用頂便當个辦法編碼（轉成功 v 是另外樁事體）。乃麼迭能麼，一個是用非 ASCII 編碼會得增加內存佔用，再一個是編碼轉換个辰光作興會得出現各色各樣个 bug。一樣个，普通話拼音用 ˉˊˇˋ 四隻符號標註聲調，弗單單輸入弗便當外加還要出毛病。當然迭個是因爲普拼方案是上世紀五十年代設計个，伊歇裏電腦還弗曾普及，個咾迭種方面考慮弗周也正常來死。
另一方面，我伲曉得拼音方案還有一個用場就是拿得來做拼音輸入法。假使一隻拼音方案各到各處全是 ˉˊˇˋ，打字哪能打法呢？算得好普通話拼音裏向迭眼符號單單只用來表示聲調，普通話拼音輸入法麼弗打聲調也弗搭界。假使講迭眼符號弗單單表示聲調，還要拿得來區分輔音元音，像煞 â ä ô ö û ü 個能个說話，乃麼死哉，拼音輸入法作興煩得來大家用也弗想用。
原則三：符號選擇儘量符合大衆習慣
迭條原則个意思是，揀擇字母對應發音个辰光，要儘量符合大家个既有認知，譬如字母 a o e 一般性表示元音，b p m f 一般性表示脣音。一隻蠻出名个反例就是切洛基語个書寫系統，字母 Ꭰ 是表示發音 /a/，字母 Ꮃ 是表示發音 /la/，迭個就忒反直覺哉。再譬方講普通話拼音个 q 代表發音 /t͡ɕʰ/，迭個就弗符合英語人士个習慣。因爲英文裏向 q 一般性表示 /k/，個咾西方人學普通話拼音，一記頭看見隻 q 就容易弗假思索讀成功 /k/ 音，要過脫一瑲再別得轉。慢慢叫適應。
粵拼經常畀人家批評用字母 j 表示發音 /j/ ，就是因爲違背仔迭個一條原則，因爲大家全習慣仔用字母 y 來代表個發音 /j/，用 j 表示就交關弗習慣。關於迭個一點下頭會得詳細解釋。
原則四：準足反映語言音位系統
迭個一條好講是頂重要个設計原則，但也是頂煩頂要出問題个。因爲音位分析有一定个主觀性，有常時一門語言个音位系統弗好完全定落來。頂熟悉个例子就是普通話，目前學術界對語普通話个元音音位數量還無麼一致共識（譬方講阿考慮兒化音也會得影響分析結果）。個咾迭眼弗同全會得直接影響拼音方案个設計，有常時甚至會得影響拼音方案个表達能力，嚴重一眼會得導致有種音也表示弗出。
要注意个是，迭個一條原則有常時是搭第一條原則相衝个。譬如英語裏向个 h 搭 ng 音互補，好硬勁歸納成功一隻音位乃麼用一隻字母表示，但是迭能就邪氣反直覺，弗適合大衆使用。迭種原則一搭原則三个取捨問題，我伲會得在拉下頭个例子裏向碰着。
別個粵語拼音方案个缺陷
拼音方案个設計原則弄清爽仔以後，我伲就好挨一挨二來看看看頂出名个幾隻粵語拼音方案：耶魯拼音、教育學院拼音方案（教院式拼音）、廣州話拼音方案（饒秉才方案），分析分析有啥個設計問題，來證明我伲揀粵拼个道理。
耶魯拼音
耶魯拼音好算除脫粵拼以外頂常見个粵語拼音方案。搭粵拼相比主要有以下幾隻區別：
- 耶魯拼音中，/a/ 在拉開音節用 a 表示，閉音節用 aa。/ɐ/ 在拉閉音節中用 a 表示，弗好表示開音節 /ɐ/。
- 耶魯拼音用 j ch y 來代表 /ts/、/tsʰ/、/j/ 三隻音。個咾元音 /yː/ 要用 yu 再好表示。
- 耶魯方案弗分 /ɵ/ 搭 /œ/，兩個全用 eu 表示。也是因爲迭個道理， 耶魯拼音弗好表示 /ɛːu/ 迭個音。
- 耶魯附加符號 ˉˊ 加上仔字母 h 一淘，表示聲調（新版本增加仔數字標調）。
首先第一點我伲已經在上文講過哉。耶魯拼音迭能設計，是因爲當初音位分析認爲開音節 /ɐ/ 是弗存在个，個咾開音節 aa 索介全縮寫成功 a。個能一縮寫法就出問題哉，首先違背仔我伲个第一條原則「一隻符號嚴格對應一隻音位」，讓學習者混亂，增加學習負擔。乃麼個能還導致開音節个 /ɐ/ 字弗好表示，譬方語氣詞「嘞」，違背仔原則四。個咾迭個是一隻蠻大个設計缺陷。
第二條裏向，耶魯拼音用仔 yu 來表示 /yː/，也是違背仔第一條「一隻符號對應一隻音位」个原則，因爲要根據前後環境來判斷實際上向讀啥個音。首先耶魯拼音已經用 y 來代表 /j/、u 代表 /u/哉，乃再規定 yu 佮在一淘讀成功 /yː/，就是「一隻字母代表一隻單元音，兩隻併起來貤代表另外一隻單元音」，迭能一個是讓學習者困惑，再一個是電腦信息處理也弗便當（輸入法難以處理簡拼、寫正則表達式全要加入環境判斷）。而粵拼方案對迭個問題个處理，我伲會在阿末个粵拼缺陷進一步說明。
第三條，耶魯拼音用 eu 來代表 /ɵ/ 搭 /œ/，迭個就是原則四裏向講个音位分析个問題哉。迭條直接導致仔耶魯拼音無麼辦法表示 /œ/ 同 /ɛːu/ 迭眼音，影響仔迭個拼音方案个表達能力，像下面迭隻表個能：
| 睡 /sɵi˨/ | 掉 /tɛːu˨/ | 𠰲 /œt˨/ | |
|---|---|---|---|
| 耶魯拼音 | seuih | 弗好表示 | 弗好表示 |
| 粵拼 | seoi6 | deu6 | oet6 |
第四條用附加符號加上仔 h 一淘來表示聲調，譬方「蛇」个發音拼成功 sèh，也違背仔原則二，也違背仔原則一，因爲 h 已經拿得來表示聲母 /h/。還好新版耶魯拼音也增加仔用數字來表示聲調个方案，迭能對信息處理邪氣有幫助。
個咾綜合來講，耶魯拼音个設計違背仔原則一二四（第三條比較主觀無法定奪），迭眼設計缺陷足夠讓我伲放棄脫耶魯拼音改用粵拼。
廣州話拼音方案（饒秉才方案）
廣州話拼音方案是 1960 年廣東省政府公佈个粵語拼音方案，後手在 1980 年出仔修訂版，因爲是饒秉才教授修訂个，個咾也稱饒秉才方案。我伲此地以 1980 年修訂後个版本爲準，解釋解釋迭隻方案有點啥個設計問題。除脫聲調以外，廣州話拼音方案搭粵拼个主要區別有：
- 用 e ê é ü 分別表示元音 /ɐ/、/œː/、/ɛː/、/yː/
- 用 y 表示輔音 /j/，gu、ku 表示 /kʷ/、/kʷʰ/
- 同時用 z c s 搭 j q x 來表示 /ts/、/tsʰ/、/s/，迭個兩組其實無啥兩樣，全是一組音位
- 入聲韻尾用 -b -d -g 表示
- 弗區分 /ɵ/ 搭 /œ/，弗好表示粵拼中个 oet 音
明顯第一點完全違背脫仔原則二，用仔大量个附加符號來表示迭眼元音。迭能嚴重礙着仔電腦个信息處理，也弗好拿得來做輸入法。另外，第三條則違背仔原則一，一隻音位用兩樣个符號來表示。迭條設計當初是爲仔兼容普通話拼音，但實際上向根本無麼必要，反倒是增加混亂。
乃麼第二搭第四點全是比較主觀个符號揀擇問題，弗好算缺點。第五條就搭前頭講个耶魯拼音一樣，弗好表示粵拼裏向个 oet eu 迭個兩隻音節。個咾總體來講第一搭第三點是頂頂嚴重个缺陷，迭個兩點直接決定廣州話拼音方案弗好在拉信息時代推廣普及。
教育學院拼音方案（教院式拼音）
教院式拼音也是除脫耶魯粵拼以外交關人用个一隻粵語拼音方案，除脫仔聲調以外，搭粵拼个主要區別有：
- 用 dz 搭 ts 來 表示 /ts/ 搭 /tsʰ/
- 用 y 來表示 /y/
- 弗區分 /ɵ/ 搭 /œ/，統一用 oe 表示
- 用 oey 來表示 粵拼中个 oei
總體來講，教院式拼音是邪氣接近粵拼个，設計也蠻科學。第二搭第四條全是主觀上个符號揀擇問題，弗是缺點。乃麼第三點上頭講過哉。唯獨第一點是一隻小缺點，因爲用 dz 搭 ts 除脫兩隻字母複雜無麼必要以外，還會得影響到輸入法个編碼處理。譬方講交關輸入法全有得聲母簡拼功能，假使我打 ts，個麼應該是識別成功「此」迭個一隻字个聲母，還是「聽寫」迭個兩隻字个聲母呢？迭能增加仔重碼率，提高仔處理成本，輸入法反倒弗好用。
粵拼个缺陷
關於 j 搭 y
粵拼喫批評喫來頂多个，就是迭個 j。交關人全問爲啥體弗拿 y 表示 /j/，因爲迭個的刮符合大衆个習慣，弗關是普通話拼音咾還是英文全是用 y 來表示 /j/。個麼爲啥體粵拼要違背原則三用 j 來代表 /j/，倒弗用 y 呢？因爲假使我伲用 y 來表示 /j/，個麼會引出一個問題：廿六個英文字母只有得迭眼多，y 拿得來表示 /j/ 哉，個麼用啥個表示 /y/？
對迭隻問題，耶魯拼音个答案是：用 y 表示 /j/，乃麼啥個辰光代表 /y/ 靠前後環境判斷。假使字母 y 後接个是 u，個麼兩隻字母 yu 連在一淘就代表 /y/。迭個就是上文講着過个「一隻字母代表一隻單元音，兩隻併起來貤代表另外一隻單元音」。就是講，耶魯拼音犧牲脫原則一來調原則三，個咾迭個就是取捨問題哉。個麼何裏隻原則重要眼？個板定是第一條，「一隻符號對應一隻音位」頂重要。因爲拼音方案个根本目的就是準足表示語言个音位系統，外加迭個一一對應關係假使破壞脫會得出交關毛病，譬如上文也講過个增加學習負擔搭信息處理成本、容易造成功混淆咾啥。
另一方面，用 j 來代表 /j/ 也無啥大違背原則三个揀擇，因爲用 y 來代表 /j/ 只不過是普通話拼音搭英文个書寫習慣。世界上向還有得交關語言个書寫系統，譬方德文也是用 j 來代表 /j/ 个。個咾實際上向是普通話拼音搭英文使用者弗適應迭個設計，調成功德文使用者就會覺着蠻正常。再講，國際音標裏向迭個音（硬齶近音）个符號就是 /j/，個咾粵拼迭能寫是遵循國際音標寫法。
韻母 yu
假使真个要講粵拼有啥個真正个設計缺陷，個麼是有一隻，就是用兩個字母 yu 來表示元音 /y/，顯得複雜無麼必要，明明好單單一隻 y 就結束也無麼啥弗好。LSHK 當初迭能設計用兩隻字母，是考慮到大衆習慣搭歷史遺留問題（原則三）。不過好消息是，目前市面上个粵拼輸入法基本上向全支持 y = yu 个縮寫，個咾大家打字个辰光假使弗高興打 yu 兩隻字母，單單打一隻 y 也完全無麼問題。
關於粵拼个設計，LSHK 个官網上面也有得自家个 FAQ，大家好參考瞭解設計當初考慮過个各色各樣个問題。
乃麼
還乃麼點啥？用粵拼呀！